"Өкмөт мүчөлөрү барып, жеринен кабар алган жок". Жанар Акаев Чаткалдагы алтын кенге байланыштуу чыккан маселени парламентте көтөрдү

Чаткал районунун Терек-Сай айылында 100дөн ашык адам митингге чыкты. Бул тууралуу Жогорку Кеңештин депутаты Жанар Акаев Социалдык маселелер, билим берүү, илим, маданият жана саламаттыкты сактоо боюнча комитетинин жыйынында айтты.

Депутат Терек-Сай айылында митингге чыккан жарандардын маселесин вице-премьер-министрге тез аранын ичинде жеткирүү керектигин билдирди.

"Чаткалдагы митингге чыккандардын маселеси тез арада чечилиши керек эле. Бирок өкмөт мүчөлөрүнөн эч ким барып жеринен кабар алган жок. Өздөрү чечип алсын деген мамиле жасалып жатат. Дал ушул иштин алкагында 2-декабрда Терек-Сай айылынын 15 тургунун тергөөнүн алкагында милиция алып кеткен. Эки тараптын тең пикирин угуп, бир пикирге алып келиш керек", - деп кайрылды эл өкүлү өкмөт мүчөлөрүнө.

Кечээ, 2-декабрда Чаткалдагы алтын кенде чыккан чыр боюнча 15 адам камакка алынып, бүгүн жүздөгөн эл митингге чыкты.