Магнитогорск шаарындагы кырсык: Уранды алдында 35 саат жаткан 11 айлык бала аман табылды

31-декабрь күнү таңкы саат 6:00дө Орусиянын Магнитогорск шаарында көп кабаттуу үйдө газ түтүгү жарылып, 79 адам дайынсыз болуп жатканы маалымдалган. Акыркы маалыматтарга ылайык, каза болгондордун саны 36га жетти.

Айрым орус басылмалары кырсык болгон күнү уранды астында калган 11 айлык Ваня Фокин аттуу бала аман калганын жазышууда.

Белгилүү болгондой, Ваня Фокин уранды алдында 35 саат жаткан.

"Кырсык болгон күнү баланын ата-энеси качып чыгууга үлгүрүшкөн, бирок керебетте жаткан баласын чыгара алышкан эмес. 1-январь күнү кечинде иштеп жаткан техникалардын баары убактылуу өчүрүлгөн учурда жаш баланын ыйлаган үнү угулган. Куткаруучулар үн чыккан жердеги урандылардын алдынан 11 айлык Ваня Фокинди табышкан. Азыркы учурда Ваня Фокин апасы менен чогуу атайын учак менен Москва шаарындагы ооруканалардын бирине жеткирилген. Дарыгерлердин айтымында, баланын абалы туруктуу", - деп жазылат маалыматта.

"Биз төртүнчү кабатта жашачубуз. Кырсык учурунда балдарыбыздын улуусу менен бирге керебетте жаткан элек. Көзүмдү ачсам караңгыда, уранды алдында жатыптырбыз. Кичүү баламды таба алган жокмун. Урандылардан суурулуп көчөгө чыктык. Ваня урандынын алдында 35 саат жатты. Сыртта 26 градус суук болчу. Анын тирүү экендигинен үмүтүбүз үзүлүп калган эле.

Балабыз азыр жасалма дем алдыруучу аппаратта жатат. Анын оң жамбашы сынып, сол бутунун тизесине чейин үшүк алган. Дарыгерлер аны операцияга даярдап жатышат", - деп баланын апасы Ольга Фокина орус басылмаларына билдирген.