Прокурордун өлүмүнө шектүүнүн арызы боюнча сот. Судья айыпталуучунун катышуусу жок чечим кабыл алууда

Тектеш кабарлар: Баткен облусунун прокурору киши колдуу болуп каза болду (37 материал)

Баткен райондук сотунда облус прокурору Анарбай Мамажакыповдун өлүмүнө шектүү катары кармалган Мелис Калыковдун арызы боюнча сот отуруму өтүүдө. Бирок айыпталуучу өзү сот залында жок. Учурда ишти карап жаткан судья Расул Оморов чечим кабыл алуу үчүн кеңешме залына кирип кеткенин SUPER.KG'ге Калыковдун бир тууганы Дариха Калыкова кабарлады.

"Иним Мелис Калыков кармалганда милиция тарабынан кыйноого кабылган жана жактоочу жок суракка алынган. Ошондон улам доо арыз менен райондук сотко кайрылганбыз. Бүгүн экинчи сот отуруму болуп жатат. Арызды карап жаткан судья Расул Оморов бир гана милиция кызматкеринин сөзүн укту. Ал дагы иним милиция бөлүмүнө өзү барганын, кет дегенине карабай отуруп алганын айтты. Андан башка эч ким суралган жок. Арыз ээси катары Калыков ушул жерге алынып келиши керек болчу. Судья алып келе албайбыз деп койду. Азыр чечим чыгаруу үчүн кеңешме бөлмөсүнө кирип кетти", - деди Калыкова.

Баткен облусунун прокурору Мамажакыповдун киши колдуу каза болгон жансыз денеси өткөн жылдын 18-ноябрь күнү таңкы саат 6:00 чамасында Баткен шаарындагы Таңги-Өтөк участкасынан табылган. Кылмыш иши козголуп, шектүү катары Баткен облустук капиталдык курулуш башкармалыгынын башчысы Мелис Калыков кармалып, камакка алынган.