Таласта айылдык кеңештин депутатынын иске ууланган үй-бүлөсү. Ооруканада жаткан кыздын оозунан кан чыгууда, ал эми электр жарыгын өчүрүп кеткендер жумуштан бошотулду

Таласта иске уланган аял жана анын кызынын сөөгү жерге берилди. Ал эми ооруканада жаткан кичинекей кызынын оозунан кан чыгып, дале эсине келе элек. Кызды дарылоо үчүн Бишкектен врачтар чакыртылды.

Маалыматты 22-февралда SUPER.KG'ге облус губернатору Марат Мураталиев кабарлады.

Ал эми аталган үй-бүлөнүн 2483 сом карызы үчүн электр жарыгын өчүрүп кеткен монтёр менен инспектор жумуштан бошотулду.

"Биз үчүн өтө кайгылуу окуя болду. Бүгүн каза болгон аял менен кызынын сөөгүн жерге бердик. Бирок ооруканада жаткан 4 жаштагы кызынын абалы өзгөрүүсүз калууда. Бишкектен дарыгерлерди чакырттык, жолдо келе жатышат. Бул жактагы дарыгерлер "үй-бүлө мүчөлөрү көмүрдөн чыккан иске ууланган болсо, буга чейин эсине келмек. Химиялык заттарды бөлүп чыгаруучу полиэтилен баштыктарын күйгүзүп, ошондон ууланган болушу мүмкүн" деп айтышууда. Өзүм да барып кабар алдым.

Үй ээсине эми колдон келген жардамыбызды беребиз. "Түндүк электр" ишканасына да кайрылып жардам бергиле деп айттым. Ишкананын директору эртең өзү да облуска келе турган болду. Бүгүн үй-бүлөнүн электр жарыгын өчүрүп кеткен монтёр менен инспектор жумуштан бошотулду. Эми алар деле "өз милдетибизди аткардык, мындай болуп кетерин билсек өчүрмөк эмеспиз" деп жатышат. Ошол жердегилер "балдар ата-энеси үйдө жоктугун айтып, өчүрбөй тургула" дегенине карабай өчүрүп коюшту" дешти. Чынында ата-энеси келгенче өчүрбөй турса мынчалыкка жетмек эмес", - деди Мураталиев.

Облус башчысынын айтымында, аталган үй-бүлөнүн кожоюну - айылдык кеңештин депутаты. Алардын жашоо-шарты жакшы болгон. Мындан бир-эки ай мурун улуу баласынын кулагы ооруп, окуя болгон учурда Бишкектеги ооруканалардын биринде дарылатып жүргөн.

Окуя 20-февралга караган түнү болгон. Андан бир күн мурун үй-бүлөнүн электр энергияга болгон карызы төлөнбөй, адистер электр жарыгын өчүрүп кетишкен. Буга байланыштуу алар үйдүн ичинде от жаккан меш болбогондуктан темир челекке от жагып, андан чыккан иске ууланып калышкан. Жыйынтыгында үй ичинде уктап жаткан үй кожойкеси менен бир кызы каза болуп, 12 жаштагы уулу менен 4 жаштагы кызы оорукананын жандандыруу бөлүмүнө жеткирилген.