Президент: "2024-жылга чейин өлкөнүн бардык аймактарын таза суу менен камсыз кылабыз деген милдетти койгонбуз"

"2024-жылга чейин өлкөнүн бардык аймактарын таза суу менен камсыз кылабыз деген милдетти койгонбуз" деп бүгүн, 31-июлда президент Сооронбай Жээнбеков Чүй облусунун Панфилов айылында элетти таза суу менен камсыз кылууну туруктуу өнүктүрүү долбоорун ишке киргизүү аземинде айтты. Бул тууралуу президенттик аппараттын басма сөз кызматы билдирди.

Маалыматка ылайык, мамлекет башчы калктуу пункттарды таза суу менен камсыз кылуу бүгүнкү күндө курч көйгөйлөрдүн бири экенин белгиледи.

"Таза суу болбосо - калктын дени сак болбойт, туризм өнүкпөйт, инвестиция келбейт. Бул комплекстүү маселе. Ошондуктан калкты таза суу менен камсыздоо мамлекеттик саясатыбыздын негизги багыттарынын бири. Биз 2024-жылга чейин Кыргыз мамлекетинин бардык аймактарын таза суу менен камсыз кылуунун үстүндө иштеп жатабыз. Өлкөбүздөгү айылдардын таза сууга болгон муктаждыгын чечүүгө жыл сайын республикалык бюджеттен дагы акча каражаты бөлүнүп берилип жатат. Бул багытта ошондой эле Кытай, Евробиримдик, Швейцария, Европа реконструкциялоо жана өнүктүрүү банкы, Дүйнөлүк Банк, Ислам өнүктүрүү банкы, Азия өнүктүрүү банкы, Сауд өнүктүрүү фонду, Ас-Салам, Ас-Сафа, Катар кайрымдуулук фонддору менен да активдүү иштеп жатабыз", - деп белгиледи Сооронбай Жээнбеков.