Депутат Алмамбет Шыкмаматов: "Борбордук шайлоо комиссиясы Текебаевдин мандатын кайтарып бериши керек". КҮНСОБОЛ

Эки жыл мурда экс-депутат Өмүрбек Текебаев "коррупция" боюнча айыпталып, 8 жылга эркинен ажыратылган. Быйыл, 21-августта Жогорку Сотто иш жаңы жагдайларга байланыштуу каралып, Текебаевге карата чыккан мурдагы өкүмдөр жокко чыгарылган. Ага карата козголгон кылмыш иштерин Биринчи Май райондук сотуна жаңы ачылган жагдайлар боюнча кайра кароого жөнөткөн. Жогорку Соттон материалдар Биринчи Май райондук сотуна келип түшкөнү белгилүү болду.

Мындан улам SUPER.KG порталы "Текебаевге карата чыгарылган сот чечимдери жокко чыгарылып, соттолду деген статусу жоюлду. Демек, аны азыр Жогорку Кеңештин депутаты деп санаш керекпи?" деген собол салды.

Депутат Алмамбет Шыкмаматов Текебаевди Жогорку Кеңештин депутаты деп санаш керек деген пикирде.

"Текебаевге карата чыгарылган сот чечимдери жокко чыгарылгандан кийин мыйзамдарга ылайык, Борбордук шайлоо комиссиясы мандатын кайтарып бериши керек. Бул Конституциянын талабы болуп эсептелет", - дейт Шыкмаматов.