Өлкө башчы Айсулуу Тыныбековага 3 бөлмөлүү батир белек кылды

Өлкө башчы Сооронбай Жээнбеков бүгүн, 25-сентябрда кыз-келиндер күрөшү боюнча дүйнө чемпиону Айсулуу Тыныбекова жана анын машыктыруучусу Нурбек Изабеков, ата-энеси Болот Тыныбеков жана Гүлпар Тыныбекова менен жолугушту. Бул тууралуу президенттик аппараттын маалымат кызматынан билдиришти. Өлкө башчысы Айсулуу Тыныбекованы Казакстандын Нур-Султан шаарында өткөн Дүйнө чемпиондугунда кыз-келиндер күрөшү боюнча 1-орунду ээлеп, Кыргыз өлкөсүнүн тарыхында эң алгачкы Дүйнө чемпиону болушу менен куттуктады.

"Сенин алтын медалың - бул кыргыз спортунун чоң ийгилиги, баарыбыз абдан кубандык. Буга чейин Азия чемпиондугунда, Азия оюндарында жеңишке жетип, эми Дүйнө чемпиондугунда алтын медалга ээ болдуң. Бул сенин жана машыктыруучуларыңдын көп жылдык талыкпаган эмгегинин үзүрү. Жеңишке жетүү абдан оор болгонун билебиз. Келерки Олимпиада оюндарында дагы ийгиликке жетишериңе ишенем", - деди Сооронбай Жээнбеков

Жолугушуунун соңунда президент Сооронбай Жээнбеков кыз-келиндер күрөшү боюнча дүйнө чемпиону Айсулуу Тыныбековага Бишкек шаарынан үч бөлмөлүү батирдин сертификатын, машыктыруучусу Нурбек Изабековго акчалай сыйлык, ата-энеси Болот Тыныбеков жана Гүлпар Тыныбековага президенттин энчилүү сааттарын тапшырды.