Бишкек шаарынын Арча-Бешик жаңы конушунда Гепарин дарысын кымбат баада сатып жаткан жарандар кармалды

Бишкек шаарынын Арча-Бешик жаңы конушунда Гепарин жана башка дарыларды кымбат баада сатып жаткан жарандар аныкталды. Бул тууралуу SUPER.KG порталына экономикалык кылмыштуулукка каршы күрөшүү боюнча мамлекеттик кызматынан билдиришти.

Маалыматка ылайык, экономикалык кылмыштуулукка каршы күрөшүү боюнча мамлекеттик кызматына шаар тургундары кайрылышып, интернетте белгисиз жарандар Гепарин дарысын кымбат баада сатыкка коюп жатышкандыгы тууралуу арызданышкан.

"Келип түшкөн арыздын негизинде, Бишкек шаарынын Арча-Бешик конушундагы үйлөрдүн биринен 100 пакет "Гепарин" препаратын 70 миң сомго (1 пакеттин наркы 700 сом) сатып жаткан жеринен жергиликтүү жашоочу кармалды. Мындан тышкары, анын үйүн тинтүү учурунда аталган дары-дармектердин дагы чоң партиясы табылган. Азыркы учурда сотко чейинки өндүрүш иши башталды жана дарынын келип чыгышын (алардын Кыргыз өлкөсүнө кандай жол менен жеткирилгендиги, белгиленген сапатка ылайык келеби же жокпу) териштирилип жатат", - деп билдиришти мекемеден.