Жалал-Абад облусунда 9 ай ичинде жол кырсыгынан 19 өспүрүм каза тапты

Жалал-Абад облусунда 2013-жылы 9 ай ичинде 476 жол-транспорт кырсыгы катталып, өткөн жылга салыштырмалуу 20,2 пайызга өскөн. Бул тууралуу 31-октябрда өкмөттүн Жалал-Абад облусундагы өкүлчүлүгүндө 9 айдын жыйынтыгы боюнча өткөн жыйында маалым болду. Жол кырсыктарынан 138 жаран каза болуп, 773 адам жаракат алган. Жаш өспүрүмдөр катталган кырсыктын саны - 134, анын ичинде 19 өспүрүм каза тапкан. Өспүрүмдөр арасында жол кырсыгынан жаракат алгандардын саны - 141. Жол-транспорт кырсыктары өткөн жылдын ушул мезгилине салыштырмалуу Жалал-Абад шаарында - 32, Сузак районунда - 30, Токтогулда - 11, Ала-Букада - 9, Таш-Көмүр шаарында - 6, Кара-Көлдө - 5, Базар-Коргон районунда 4 кырсыкка өскөн.