Чаламандын чак түшүндө унаадагы барсетканы уурдаган. Шектүү убактылуу кармоочу жайга киргизилди

Бишкекте унаанын ичиндеги барсетканы уурдоо фактысы камерага тартылып калган. Октябрь РИИБинин маалымат кызматынан шектүү колго түшүрүлгөнүн бүгүн, 23-майда кабарлашты.

Белгилүү болгондой, 9-майда шаар тургуну арыз менен милицияга кайрылган. Анда ошол эле күнү саат 14:50 чамасында Дэу Нексия унаасынан барсеткасын уурдап кеткени кабарланган. Арыздануучу барсеткасында акча жана телефону болгонун, жалпысынан 42 миң сом зыянга учураганын билдирген.

Бул факты Кылмыштардын бирдиктүү реестрине 205-берене менен катталып, сотко чейинки тергөө иштери башталган.

"Тергөө иштеринин жүрүшүндө жогорудагы кылмышка шектелип 1987-жылы туулган Е.С. кармалып, убактылуу кармоочу жайга киргизилди. Шектүү уурдап алган буюмдарын кайда жашырганын көрсөткөн. Учурда тергөө иштери улантылууда", - дешет маалымат кызматынан.