Ошто "Петербург кечеси" өтөт

Ош шаарында "Кыргызстандагы Петербург кечеси" деген аталыштагы маданий иш-чара өтөт. Ал 5-9-ноябрь күндөрү уюштуруларын калаа мэриясынын маалымат кызматынан кабарлашты.

Мэриянын маалыматында Ош менен Санкт-Петербург бир тууган шаар экени айтылат.

6-ноябрда петербургдук жазуучулар Оштун чыгармачыл интеллигенциясы менен жолугат. СССРдин 100 жылдыгына арналган "Биздин дарек-Советтер Союзу" (Наш адрес-Советский Союз) деп аталган жыйнактын бет ачары болот. Ага кыргызстандык автор Бахтияр Койчуевдин "Гроза" чыгармасы кирген.

8-9-ноябрда адабият мугалимдери үчүн азыркы орус адабиятындагы негизги тенденциялар боюнча курстар менен мастер-класстар болот. Анын жыйынтыгы менен катышуучуларга сертификат тапшырылат.

Мындан сырткары, бир тууган шаарлардын алкагында кызматташууга багытталган иш-чара өтөт. Анын жүрүшүндө тараптар мындан аркы алаканы өнүктүрүү жана кеңейтүү жолдорун талкуулайт.

Белгилүү болгондой, иш-чараны Орусиянын тышкы иштер министрлигинин колдоосунда Санкт-Петербургдун тышкы байланыштар боюнча комитети менен Ош мэриясы уюштуруп жатат.