Майлуу-Суудагы кырдаал: Шаар тургундарынын 68 пайызы жылуулук менен камсыздалды

Жалал-Абад облусунун Майлуу-Суу шаарынын тургундарына ичүүчү таза суу жана турмуш-тиричиликке колдонуу үчүн 48 тонна суу жеке менчик унаанын жардамында шаар тургундарына жеткирилди. Бул тууралуу Өзгөчө кырдаалдар министрлигинен кабарлашты.

Жалал-Абад, Кочкор-Ата, Таш-Көмүр шаарларынын жылуулук тармагында эмгектенген адистер чакыртылып, катуу сууктан авариялык абалга келген көп кабаттуу турак жайлардагы жылытуучу түтүкчөлөрдү оңдоп-түзөө иштери башталды.

Ал эми буга чейин №1, №4 от казандар ишке киргизилип, бүгүн №3 от казанга альтернативдүү жол катары жаңы түтүктөр орнотулуп, моторлор коюлууда. Жалпысынан шаар тургундарынын 68 пайызы жылуулук менен камсыздалды.

Ошондой эле таза суу келүүчү суу түтүкчөлөрүн жылытууга мүмкүн болбогон 2 чакырым аралык жеринде жаңы суу түтүгүн орнотуу максатында 11 техника тартылып, казуу иштери жүрүүдө.