Түптөгү дагы үч айылда сел жүрдү 

Бүгүн, 7-августта Ысык-Көл облусунун Түп районундагы Каркыра айыл аймагына караштуу айылдарда сел жүрдү. Бул тууралуу Өзгөчө кырдаалдар министрлигинен кабарлашты.

Алдын ала маалымат боюнча саат 16:00 чамасында кыска мөөнөттө жаап өткөн жаандын кесепетинен, кокту-колоттордон келген сел суулары Талды-Суу, Көчү, Корумду айылдарын каптагандыгы тууралуу маалымат түшкөн.

Жеринде маалыматты тактоо, аныктоо максатында ыкчам топ тартылган. Учурда аталган айылдарда 41 куткаруучу иш алып барууда. Мында Өзгөчө кырдаалдар министрлигинин 1 жүктөгүчү жана 3 экскаватору тазалоо иштерин аткарып жатат.

Ал эми сел сууларын тазалоо үчүн Балыкчы, Каракол шаарларынын суу сордуруучу мотопомпалары жана авариялык-куткаруу унаасы, оор жүк ташуучу 3 ХОВО унаасы тартылды.

Министрлик жериндеги абалдан кошумча маалымат берилерин билдирди.

Буга чейин Түптүн Кең-Суу жана Байзак айылдарында сел жүргөн.