Жапаров менен Рахмон чек ара маселесин талкуулашты

Бүгүн, 14-сентябрда президент Садыр Жапаров Душанбе шаарында Тажикстандын президенти Эмомали Рахмон менен жолугушту. Бул тууралуу мамлекет башчынын маалымат кызматы кабарлайт.

Маалымдалгандай, эки өлкөнүн лидерлери кыргыз-тажик эки тараптуу кызматташтыгынын актуалдуу маселелерин, темалардын кеңири спектрин, анын ичинде кыргыз-тажик мамлекеттик чек арасын делимитациялоо жана демаркациялоо маселелерин талкуулашты.

Садыр Жапаров менен Эмомали Рахмон эки мамлекеттин жана элдердин ортосундагы ынак коңшулукту бекемдөө максатында үзгүлтүксүз саясий диалогду улантуунун маанилүүлүгүн баса белгилеп, эки тараптуу мамилелердин бардык спектри боюнча ачык жана мазмундуу баарлашууга даяр экендиктерин билдиришти.

Жапаров Борбор Азия мамлекет башчыларынын бешинчи консультативдик жолугушуусуна катышат.