Президент өлкөдөгү тоолуу региондорду өнүктүрүүнүн беш жылдыгын жарыялады

Кыргызстанда 2023-2027-жылдар тоолуу региондорду өнүктүрүү боюнча иш-аракеттердин беш жылдыгы деп жарыяланды. Бул тууралуу президенттин маалымат кызматынан билдиришти.

Мамлекет башчы Садыр Жапаров койгон жарлыкка ылайык, өлкөнүн экологиялык, экономикалык, азык-түлүк коопсуздугун камсыз кылуу, климаттын туруктуулугун жогорулатуу, жаратылыш мурастарын сактоо жана Конституциянын 71-беренесине ылайык өлкөдө 2023-2027-жылдар мезгили тоолуу региондорду өнүктүрүү боюнча иш-аракеттердин беш жылдыгы деп жарыяланды.

Буга байланыштуу тоолуу региондорду өнүктүрүү боюнча иш-аракеттердин беш жылдыгын даярдоо жана өткөрүү боюнча уюштуруу комитети түзүлүп, Нурлан Айтмурзаев бул боюнча президенттин атайын өкүлү болуп дайындалды.

Ошондой эле Тышкы иштер министрлигине бир айлык мөөнөттө тоолуу региондорду өнүктүрүү боюнча иш-аракеттердин беш жылдыгын ишке ашыруу боюнча Жол картанын долбоорун иштеп чыгуу жана Министрлер кабинетинин бекитүүсүнө киргизүү тапшырылды.