Садыр Жапаров: “Орусия менен соода жүгүртүүнү 5 миллиард долларга жеткирүү керек”

Бүгүн, 12-октябрда президент Садыр Жапаров менен Кыргызстанга расмий иш сапары менен келген Орусиянын президенти Владимир Путин биргелешкен документтерге кол коюу аземине катышты.

Иш-чарада эки өлкөнүн бир нече министрлигинин өкүлдөрү тиешелүү документтерге кол коюшту.

Андан соң эки өлкө башчылары сөз сүйлөп, Садыр Жапаров эки өлкөнүн соода жүгүртүүсүн 5 миллиард долларга чейин көтөрүү керектигин айтты.

“Москва менен Бишкек жакын арада соода жүгүртүүнү 2022-жылдагы 3,5 миллиард доллардан 5 миллиард долларга чейин көтөрүшү керек”, - деди Жапаров.

Ошондой эле өлкө башчы ЕАЭБ алкагындагы кыргыз-орус өз ара аракеттенүүсү өзгөчө актуалдуу экенин билдирди.

“Биз интеграциялык процесстерди мындан ары тереңдетүү үчүн күч-аракетибизди жумшайбыз”, - деп кошумчалады өлкө башчы.

Ал эми Орус лидери Владимир Путин Кыргызстандын ИДПсы ЕАЭБге киргенден бери 2,3 эсеге өскөнүн, экспорттун көлөмү болсо эки эсеге көбөйгөнүн маалымдады.