Жапаров менен Ташиев Жалал-Абаддагы жаңы оңдолгон көчөлөрдү унаа менен кыдырды (видео)

Өлкө башчы Садыр Жапаров бүгүн, 26-октябрда Жалал-Абад шаарындагы аз убакыт мурда оңдолуп бүткөн ички жолдордун абалы менен таанышты.

Президенттин басма сөз кызматынан билдиргендей, мамлекет башчысы УКМКнын төрагасы Камчыбек Ташиев менен биргеликте калаадагы быйыл оңдолуп бүткөрүлгөн көчөлөрдү автоунаа менен кыдырды.

"Курманбек, Малашев, Манас, Назаров, Балтагулов, Осмонов, Пушкин, Мамыр Баатыр, Байзаков көчөлөрүн оңдоо иштери үстүбүздөгү жылы башталып, бүгүнкү күнү өз мөөнөтүндө бүткөрүлдү. Көчөлөрдү кыдырган маалда бардык пландалган жерлерге асфальт төшөлүп, түтүктөр алмаштырылып, жөө адамдар өтүүчү жолдор салынып, тротуарлар жана түнкү жарыктандыруу орнотулгандыгы белгиленди. Бардык иштер бюджеттин эсебинен жүргүзүлгөн", - деп айтылат билдирүүдө.