"2 миллиондон ашык сомго сатылды". Унаа мекемеси колдонулган номерлерди сатуу үчүн аукцион өткөрдү

“Унаа” мамлекеттик мекемесинде колдонулган жана жокко чыгарылган мамлекеттик номерлерди сатуу боюнча ачык аукцион өткөрүлгөнүн бүгүн, 18-декабрда мекеменин басма сөз кызматы билдирди.

Маалыматка ылайык, аукцион 7- декабрда өткөрүлүп, жокко чыгарылган жана колдонулган номерлер сатыкка коюлган. Алюминий сыныктарынын жалпы салмагы 26 миң 400 килограммды түзүп, бир килограммынын баштапкы баасы 100 сомго коюлган. Аукциондун жүрүшүндө 6 сом 12 тыйынга кымбаттап, товардын акыркы баасы 1 килограмм үчүн 106 сом 12 тыйынды түзгөн.

Жыйынтыгында алюминий сыныктары 2 миллион 801 миң 568 сомго сатылды. Түшкөн каражат мамлекеттик бюджетке которулат.

"Быйыл ушундай аукцион экинчи жолу өтүп жатат. Биринчи аукционду өткөрүүдөн түшкөн каражаттын суммасы 6 миллион 970 миң 649 сомду түзүп, ошондой эле республикалык бюджетке которулган", - деп айтылат билдирүүдө.