Токтогулда адам сабоого шектелген үчүнчү жаран кармалды

Токтогулда ден соолукка оор залал келтирүү фактысы боюнча үчүнчү жаран кармалды. Бул тууралуу Жалал-Абад ОИИБинен билдирди.

Маалыматка ылайык, былтыр 3-ноябрда 1981-жылы туулган район тургунун бейтааныш балдар ур-токмокко алып, денесине жараат келтирип, ал алган жараатынан улам ооруканага жаткырылган.

Бул факты боюнча Кылмыш-жаза кодексинин 130-беренесине (Ден соолукка оор залал келтирүү) ылайык кылмыш иши козголгон.

Ошондой эле соттук-медициналык экспертиза дайындалып, анын жыйынтыгы менен жабырлануучу денесинен оор жараат алгандыгы аныкталган.

Буга байланыштуу Токтогул районунун 2 тургуну кармалып, камакка алынган. Ал эми окуянын үчүнчү катышуучусу тергөөгө келбей изин жашырып жүргөн.

"2024-жылдын 16-мартында милиция кызматкерлери жүргүзгөн издөө иштеринин натыйжасында кылмыш ишине шектелген үчүнчү жаран, Токтогул районунун тургуну 2004-жылы туулган К.А. кармалып, 2 айга убактылуу кармоочу жайга киргизилди", - деп айтылат маалыматта.

Учурда тергөө амалдары жүрүүдө.