Төө-Ашууда чоң жүк ташуучу унааларга кайрадан чектөө киргизилди

Бүгүн, 29-октябрда Төө-Ашуу ашуусунда Бишкек-Ош унаа жолунун 81-чакырымында (п.Сосновка) чоң жүк ташуучу унаалар үчүн чектөө киргизилди. Бул туурасында “Кыргызавтожол-Түндүк” МИ басма сөз кызматы билдирип, саат 12:35теги маалыматы менен бөлүштү.

Маалымдалгандай, көпчүлүк унаалар жайкы дөңгөлөктөрү менен жолго чыгып, каттамда кыйынчылык жаралып, тыгындар болууда. Ошондой эле, атайын техниканын жумушуна тоскоолдук жаралууда.

Кошумчалангандай, учурда №9 ЖТИ кызматкерлери тарабынан жолду кардан тазалоо жана кум-туз аралашмасын себүү иштери жүргүзүлүүдө.

Ал эми ишкана ашуу тилкелерге сөзсүз кышкы дөңгөлөк менен чыгууга, тайгакка каршы чынжырларды алып жүрүүгө чакырат. Ошондой эле 500 метр аралыкты сактоо керектигин эскертти.