Дагестанда эки аялды барымтага алган жергиликтүү тургун кармалды

Дагестандын Тарумовка районунда эки аялды барымтада кармап турган куралчан киши кармалып, аялдар бошотулду. Бул тууралуу чет элдик басылмалар жазышууда.

Маалыматка ылайык, 62 жаштагы жергиликтүү тургун мурдагы жубайынын үйүнө мылтык менен кирип барып, ал жерде болгон мурунку аялын жана анын эжесин барымтага алган.

Шектүү мурдагы жубайы менен болгон үй маселеси боюнча талашты чечүү үчүн райондук судья менен прокуратура кызматкерин чакыртууну талап кылган.

Тартип сакчылары сүйлөшүү жолу менен мурдагы жубайынын эжесин бошотууга жетишкен. Эки саат өткөн соң экинчи аял бошотулду.

"Окуя болгон жерден курал жана ок-дарылар алынды. Шектүү полиция бөлүмүнө жеткирилди", — деп айтылат маалыматта.