CNN: НАТО Украина үчүн АКШдан курал сатып алуунун жаңы схемасын иштеп чыкты

АКШнын Коргоо министрлиги менен НАТО уюму Европа өлкөлөрүнүн Украина үчүн курал сатып алуусунун жаңы схемасын иштеп чыгышты. Бул тууралуу CNN басылмасы жазды.

Жаңы механизмдин алкагында НАТО үчүн өзүнчө банк эсеби түзүлүп, союздаштар ошол эсепке акча которуп, АКШдан курал сатып алууда колдоно алышат.

Украина керектүү куралдардын тизмесин түздөн-түз НАТОго жөнөтөт, андан кийин АКШнын Европа боюнча командачылыгынын башчысы жана НАТОнун Европадагы бириккен күчтөрүнүн башкы кол башчысы Алексус Гринкевич АКШда сатууга жетиштүү запастар бар-жогун тактайт.

Андан соң Гринкевич тизмени европалык өнөктөштөргө өткөрүп берип, алар курал сатып алуусун камсыз кылат.

CNN белгилегендей, Пентагондо июль айында Украинага жөнөтүлүшү керек болгон куралды кайрадан АКШнын запасына кайтарууга мүмкүнчүлүк берген меморандум даярдалган.

НАТО өлкөлөрү Украина үчүн курал сатып алууга 10 миллиард доллар бөлүүнү пландап жатышат. Буга чейин альянстын башкы катчысы Марк Рютте НАТОго мүчө өлкөлөр Украинага курал-жарак берүү үчүн 1 миллиард доллардан ашык каражат бөлүүгө милдеттенме алышканын билдирген. Мисалы, Нидерланд өлкөсү Украинага 500 миллион евролук америкалык курал өткөрүп берүүнү көздөп жатышат.