Польша концерт учурундагы башаламандыкка байланыштуу 57 украиналыкты өлкөдөн чыгарат

Польшанын премьер-министри Дональд Туск 9-августта Варшавада өткөн Макс Корждун концерти учурундагы башаламандыкка байланыштуу 57 украиналык жана 6 Беларусь жаранын өлкөдөн чыгарыларын билдирди. Ал бул адамдардын аракеттерин "агрессиялык иш-аракеттер" жана "провокация" деп атап, алар Польшадан чыгышы керек экенин айтты.

Польша полициясы концерте 109 адам кармалганын кабарлаган. Кармалгандарга коопсуздук кызматкерлерине кол салуу, пиротехникалык каражаттарды алып кирүү, баңгизаттарды сактоо жана массалык иш-чарага мыйзамсыз кирүү деген айыптар коюлган.

Туск Польшада антиукраиналык маанайдын күчөшүнө жол берилбеши керектигин белгиледи.

"Украиналыктардын Польшага карата антипатиялык аракеттери жана Польшадагы антиукраиналык маанайды козутуу — бул Путиндин сценарийи, аны чет өлкөлүк агенттер жана жергиликтүү тургундар уюштуруп жатышат", — деп жазды Туск өзүнүн социалдык тармактагы баракчасында.