Тибеттеги жаныбарлардын үйүрүнө антилопа сымал робот жиберилди (видео)

Кытайлык илимпоздор Тибет тоо кыркаларындагы антилопалардын жашоо чөйрөсүн жана экологиялык абалын байкоо үчүн жаныбарга окшош роботту антилопалардын үйүрүнө кошушту. Бул тууралуу "Синьхуа" агенттиги билдирди.

Түндүк-Батыш тоо биологиясы институтунун (NWIPB) илимий кызматкери Лянь Синьминдин айтымында, “Тибеттик антилопанын роботу” антилопалардын жүрүм-турумун изилдөөгө так жана ишенимдүү маалыматтарды берет, ошондой эле сейрек кездешүүчү жапайы жаныбарларды жана коруктагы табигый экологияны коргоодо жардам көрсөтөт.

Маалыматка ылайык, робот эки километр жол басып, 4600 метр бийиктиктеги Кэкэсили коругундагы антилопалардын үйүрүнө ийгиликтүү аралаша алды. Мунун аркасында изилдөөчүлөр жапайы жаныбарларды жакын аралыктан байкай алышты.

Агенттик жарыялаган видеодо робот төрт буттап жүрүп, сырткы көрүнүшү чыныгы антилопага окшоштурулган. Көзүнүн астына эки камера орнотулган.

Тибеттик антилопа -дүйнөдөгү эң аз изилденген туяктуу жаныбарлардын бири. Негизинен алар Тибет тоо талааларында жана Индиянын Ладакх аймагында жашайт. Баалуу жүнүнөн улам браконьерлердин курмандыгы болуп келишет.