Трамптын жубайы Байдендин уулун 1 миллиард долларлык доо арыз менен коркутту

АКШнын биринчи айымы Мелания Трамп мурдагы президент Жо Байдендин уулу Хантер Байденди 1 миллиард доллардан ашуун доо арыз менен коркутту. Бул тууралуу Fox News жарыялады.

Август айынын башында Хантер Байден журналист Эндрю Каллаханга интервью берип, анда финансист Жеффри Эпштейнге байланыштуу жарыяланбаган документтер менен АКШ президенти Дональд Трампты "ачыкка чыгарууга" мүмкүн экенин белгилеген. Байдендин айтымында, Эпштейн Меланияны Трамп менен тааныштырган.

Мелания Трамптын кызыкчылыгын коргогон адвокат Алехандро Брито Байденди "жалган, абийирге шек келтирген жана кемсинткен билдирүүлөрдөн" баш тартууга чакырган.

Адвокат билдиргендей, эгер Хантер Байден талапты аткарбаса, Мелания Трамп өзүнө келтирилген ири финансылык жана репутациялык зыянды калыбына келтирүү үчүн мыйзам чегинде бардык укуктарын колдонууга аргасыз болот. Байдендин сөздөрү көптөгөн медиа булактарында жана миллиондогон катталуучусу бар социалдык тармактын колдонуучулары тарабынан жарыяланган.

Мелания Трамп Дональд Трамп менен 2005-жылы үйлөнгөн. Harperʼs Bazaar журналы 2016-жылдын январь айында Мелания Трамп 1998-жылдын ноябрь айында модель агенттигинин ээси уюштурган кечеде Трамп менен таанышканын жазган.

Эске сала кетсек, 2019-жылы Жеффри Эпштейнге АКШда жашы жете электерди сексуалдык эксплуатация максатында сатууга байланыштуу айып коюлуп, ага 40 жылга чейин эркинен ажыратуу коркунучу жаралган. Айыптоочулардын маалыматы боюнча, ал 2002-2005-жылдары ондогон жашы жете элек кыздар менен жыныстык байланышта болуп, кээ бирлерине жаңы кыздарды алып келүүгө буйрук берген. Айрым жабырлануучулардын 14 жашка да толо элек болгону айтылган. Эпштейндин жансыз денеси 2019-жылы сот процесси жүрүп жатканда, абактан табылган. Расмий маалыматтар боюнча, ал өзүнө кол салган. Бирок анын өлүмүнө байланыштуу көптөгөн божомолдор айтылып келет.