Оштогу "Жылуулук камсыздоо" ишканасы жаңы имараттуу болду

Оштогу муниципалдык "Жылуулук камсыздоо" ишканасынын башкы имараты Анар кичи районундагы жаңы имаратка көчтү. Бул тууралуу бүгүн, 14-августта Ош шаарынын мэриясынан билдиришти.

Жаңы имараттын ачылышына Ош шаарынын мэри Жеңишбек Токторбаев, шаардык кеңештин төрагасы Болот Баетов жана мекеме кызматкерлери катышты.

Маалым болгондой, имарат буга чейин Ош шаардык суу чарба башкармалыгына тиешелүү болгон. Жеңишбек Токторбаевдин тапшырмасынын негизинде бул имарат "Жылуулук камсыздоо" ишканасына берилип, толук кандуу капиталдык оңдоп-түзөөдөн өттү. Бардык зарыл шарттар түзүлдү.

Калаа башчы кызматкерлерге күжүрмөн эмгек каалап, алдыдагы жылытуу мезгилине мыкты даярдык көрүү тапшырмасын берди. Ошондой эле ишканага президент Садыр Жапаровдун атынан атайын техникалар тапшырылды.