Бишкекте мурдагы аткаминерлер кармалышты

Бишкектин Октябрь районунун мурдагы акими жана Курулуш, архитектура жана турак жай-коммуналдык чарба министрлигинин мурдагы кызматкери кармалды. Бул тууралуу Улуттук коопсуздук мамлекеттик комитети билдирди.

Маалыматка ылайык, алар район аймагындагы жер тилкелерин мыйзамсыз менчиктештирип алышкан. Тагыраагы, шектүүлөр тиешелүү документтерди жасалмалоо жолу менен 1 гектардан ашык аянттагы 21 мамлекеттик жер тилкесин ээлеп алышкан. Натыйжада мамлекетке 300 миллион сомдон ашык зыян келтирилген.

Алар жасаган күнөөлөрүн моюнуна алышып, өз ыктыяры менен жер тилкелерин мамлекеттин менчигине кайтарып беришкен. Учурда шектүүлөр убактылуу кармоочу жайга киргизилишип, тергөө иштери уланууда.