Чек аралардагы айыл чарба товарларын тоскоолдуксуз өткөрүү иши көзөмөлгө алынды

Айыл чарба министри Бакыт Төрөбаевдин тапшырмасына ылайык, Евразия экономикалык биримдигине (ЕАЭБ) мүчө мамлекеттерге Кыргызстандан тез бузулуучу айыл чарба товарларын ташыган автотранспорт каражаттарын тоскоолдуксуз өткөрүү иши көзөмөлгө алынды. Бул тууралуу министрликтин басма сөз кызматы билдирди.

Маалыматка ылайык, министрликке караштуу Өсүмдүктөрдү химиялаштыруу, коргоо жана карантин департаментинин директору Турсунбек Кубанычбеков кечээ, 14-августта кыргыз-казак мамлекеттик чек арасындагы "Ак-Тилек" жана "Ак-Жол" өткөрүү пункттарына жакын жайгашкан "Жыйынды постторго" барып, тапшырманын аткарылышын текшерди.

Көзөмөлдүн жыйынтыгында, кыргыз-казак мамлекеттик чек арасында тез бузулуучу айыл чарба товарларын ташыган автотранспорт каражаттарынын кезеги жок экендиги аныкталды. Бардык продукция фитосанитардык көзөмөлдөн өтүп, тиешелүү документтер алынгандан кийин, Улуттук коопсуздук мамлекеттик комитетинин чек ара кызматы тарабынан кезексиз өткөрүлүүдө.