Дмитрий Биволго операциядан кийин эскертүү берилди

Дүйнөлүк бокс уюму (WBO) жарым оор салмактагы дүйнө чемпиону Дмитрий Биволго анын операциясы тууралуу жаңылыктардан кийин кайрылуу жасады. Бул тууралуу уюм расмий сайтында жарыялады.

Маалыматта уюм чемпиондон жакында өткөн бел омурткасына жасалган операция боюнча документтерди талап кылган. Ошондой эле айыгуу мөөнөтүн жана машыгууга кайтып келүү датасын көрсөтүүнү суранган.

"Жакында жасалган бел омурткасына операциядан кийин WBO чемпиону Дмитрий Биволго жаракаты, айыгуу божомолдору жана рингге кайтып чыгууга уруксаты боюнча толук медициналык документтерди берүү тапшырылды. Уюм Биволдун спортко болгон берилгендигин жана салымын колдоого, аларын белгилөө менен бирге чемпиондуктун адилеттүүлүгүн жана ачыктыгын сактоо зарылдыгын баса белгиледи", — деп жазды WBO.

Эске салсак, Дмитрий Бивол учурда ооруканада жатат. Ал социалдык тармактагы баракчасында дарыгердин сунушу боюнча он жылдан ашуун убакыттан бери күрөшүп келген эски бел жаракатына операция жасатууга туура келгенин айткан.

Эми аны реабилитация мезгили күтөт — бул учурда ал машыгууларды токтотуп, жыл аягына чейин беттештерге чыкпайт. Бул жагдай күйөрмандар күткөн Бивол менен мурдагы абсолюттук чемпион Артур Бетербиевдин үчүнчү беттешин жокко чыгарды.

Буга чейин Бетербиев Бивол "чегинүү жолун тандады" деп айтып, аны күтпөй турганын жана өз жолун улантарын билдирген.