Ооганстанда мигранттарды ташыган автобус өрттөнүп, 71 адам каза болду

Ирандан депортацияланган мигранттарды ташып бараткан автобус Ооганстандын аймагында кырсыкка учурады. Кагылышуудан кийин автобус өрттөнүп, 71 адамдын өмүрү кыйылды. Ооганстандын Маданият жана маалымат башкармалыгынын жетекчиси Ахмедулла Муттаки бул тууралуу X социалдык тармагындагы баракчасында маалымат берди.

Анын айтымында, автобус мотоцикл жана жүк ташуучу унаа менен кагылышкан. Кагылышуудан улам автобус толугу менен өрттөнүп, ондогон адамдар каза болгон. Бирок кырсыктан өлгөндөрдүн так саны боюнча расмий маалымат азырынча жарыялана элек.

Иранда 2023-жылдан тарта мыйзамсыз жүргөн чет өлкөлүктөрдү, негизинен оогандарды, массалык түрдө депортациялоо күчөгөн. Буга "Израилдин пайдасына террордук жана диверсиялык аракеттерге барган айрым адамдар өлкөгө мыйзамсыз кирген оогандар болгон" деген кабарлар себеп болгону айтылган.

Ирандын Ички иштер министрлигинин Чет элдиктер жана качкындар башкармалыгынын жетекчиси Надир Ярахмеди 11-июлда берген маалыматына ылайык, 21-марттан бери 772 миңден ашуун ооганстандык мыйзамсыз мигрант Ирандан чыгып кеткен.