Министрлер кабинети көрүстөндө көмүү жайларын брондоо тартибин бекитти

Министрлер кабинети өлкөнүн көрүстөндөрүндө көмүү жайларын брондоо тартибин токтом менен бекитти. Тиешелүү токтомго Адылбек Касымалиев кол койду.

Мындай чечим көрүстөндөрдө көмүү жайларын брондоо эрежелерин, анын ичинде шарттарын, мөөнөттөрүн, наркын жана тариздөө жол-жобосун аныктайт.

Тартиптин максаты – жарандардын сөөгүн жайга кадыр-барктуу коюуга болгон укуктарын камсыз кылуу, санитардык, экологиялык, шаар куруу жана диний-маданий ченемдерди сактоо, көрүстөндөрдү эсепке алууну жана натыйжалуу башкарууну системалаштыруу, кызмат көрсөтүүнүн жана пайдалануунун ачык-айкын механизмин түзүү.

Документтин негизинде жергиликтүү өз алдынча башкаруу органдары өз чечимдерин токтомго ылайык келтирет. Ал эми, бул токтом расмий жарыяланган күндөн тартып он беш күн өткөндөн кийин күчүнө кирет.