Автобус эсиңиздеби? Жапаров менен Токаев казак президентинин атасы окуган мектепке барышты

Бүгүн, 22-августта өлкө башчы Садыр Жапаров менен Казакстандын лидери Касым-Жомарт Токаев Бишкектеги Кемел Токаев атындагы №33 орто мектеп-гимназиясына барышты. Бул тууралуу президенттин администрациясы билдирди.

Маалымдалгандай, мамлекет башчылар мектептин имаратын жана Кемел Токаевге арналган маалымат бурчун көрүшкөн. Андан соң лидерлерге буга чейин Казакстандын президенти белек кылган окуучулар үчүн автобус көрсөтүлдү. Мындан тышкары президенттер мектеп-гимназиянын жамааты жана окуучулары менен баарлашышты.

Соңунда Касым-Жомарт Токаев окуучуларга окуудагы ийгиликтерди каалап, мектеп келечектеги лидерлерди жана татыктуу адистерди тарбиялап чыгарат деген үмүтүн билдирди.

Билим берүү мекемеси 1940-жылы негизделген. Улуу Ата Мекендик согуш жылдарында имарат мотоаткычтар окуу жайы жана аскердик госпиталь катары пайдаланылган. Анын бүтүрүүчүлөрүнүн арасында согуштун катышуучулары, анын ичинде Улуу Ата Мекендик согуштун I жана II даражадагы ордендеринин кавалери, жазуучу Кемел Токаев бар.

1947-жылдын 1-сентябрында мектеп өз ишин жандандырган. 2012-жылы ал мектеп-гимназия макамын алган. Быйыл май айында Садыр Жапаровдун демилгеси менен мектеп-гимназияга Кемел Токаевдин ысымы ыйгарылган. Учурда №33 мектеп-гимназиясы Бишкектеги эң мыкты он билим берүү мекемесинин катарына кирет.