Жеңиш чокусунда калган альпинист Наговцинанын тоого чыгуусунун себеби белгилүү болду

Орусиялык альпинист Наталья Наговцина "Ак илбирс" ардактуу төш белгисин алуу үчүн Кыргызстандагы Жеңиш чокусуна экспедицияга барган. Бул тууралуу спортчунун досу Лия Попова Комсомольская правда басылмасына билдирди.

Ал бул Наговицынанын жыл бою эңсеген кыялы болгонун белгиледи.

"Өткөн жылы ал Жеңиш чокусуна чыгууга аракет кылган. Бирок гид кийин даярдануу керектигин айтып, артка бурулушкан. Жыл бою ал жөө жүрүш жөнүндө айтып жүрдү. Бул анын кыялы болгон. "Ак илбирс" төш белгисин алуу үчүн бешинчи жети миң бийиктиктеги чокуну багынтуу болгон. Альпинисттер үчүн бул абдан престиждүү", - деген спортчунун досу.

“Ак илбирс” программасына альпинизм коомчулугунда кадыр-барктуу жетишкендик катары эсептелген Исмаил Сомони, Жеңиш, Ленин, Озоди жана Хан-Теңири чокуларына чыгуу камтылган.

Белгилей кетсек, Наталья Наговцина 12-августта Жеңиш чокусунан түшүп келе жатып бутун сындырган. Ал болжолдуу 7140 метр бийиктикте жатат. Башында куткаруучулар альпинистке 2-3 күндүн ичинде жетүүнү пландашкан, бирок кийин 5 күнгө узартылган.

16-августта куткаруу иштерине барган Коргоо министрлигине караштуу Ми-8 тик учагы аба ырайынын татаалдыгынан кырсыкка учурады. Экипаж мүчөлөрү жаракат алып, алар Караколго жеткирилген.

Өзгөчө кырдаалдар министрлиги куткаруучулар тобу ага жөнөтүгөнүн билдирип, 24-августта Наталья Наговцинага жетип барышарын белгилеген. Бирок кечээ, 23-августта ӨКМ куткаруу иштери толугу менен токтотулганын кабарлады. Буга аба ырайынын кескин төмөндөшү жана куткаруу тобунун жетекчисинин жаракат алып калышы себеп болгон.