Вьетнамда тайфундан улам 600 миң адам эвакуацияланууда

Бүгүн, 25-августта Вьетнам бийлиги өлкөгө сокку уруучу «Кадзики» тайфунуна байланыштуу бир нече провинциядан 586 миң адамды эвакуациялоону жарыялады. Бул тууралуу CNBC агенттиги кабарлады. Башка аймактардын тургундарына тайфундун негизги фронту өтүп кеткенге чейин үйдөн чыкпоо сунушталды.

«Кадзики» тайфуну 20-августта Филиппинге жакын деңизде пайда болгон. Азыр ал бат ылдамдык менен Кытай жана Вьетнам тарапка жылууда. Тайфундун ичинде шамалдын ылдамдыгы саатына 200 километрге чейин жетет. Синоптиктердин божомолунда, тайфун 25-августта эртең менен Вьетнамдын жээгине жетип, бул сел жана жер көчкү коркунучун жаратат. Шамалдын күчүнөн жээктеги толкундардын бийиктиги 2–4 метрге жетиши мүмкүн.

Аймакта жүргөн 60 миңге жакын майда кайык жана кеме тайфун боюнча алдын ала эскертүү алышты.

Адистердин баамында, «Кадзики» тайфуну 300 миң гектардай күрүч аянттарына жана 77 миңдей жемиш бактары отургузулган плантацияларга зыян келтириши мүмкүн.