Балыкчыда бокс тренери окуучулары менен күзөтчүнү сабап салган окуя катталды

Ысык-Көл облусунун Балыкчы шаарындагы эс алуу борборлорунун кароолчусун сабап кеткен уюшкан кылмыштуу топтун мүчөсү кармалды. Бул тууралуу бүгүн 25-августта УКМКнын маалымат борбору билдирди.

Маалым болгондой, топ адамдар тарабынан кол салуу жана ур-токмокко алуу фактысы боюнча бокс боюнча машыктыруучу Б.Б. аттуу жаран кармалды. Ал 7-июлда Балыкчы шаарындагы "Грин Сити" борборунда бокс боюнча эл аралык турнирдин жүрүшүндө жашы жете элек окуучулары менен күзөтчүгө кол салышкан.

Такталгандай, жабырлануучу буга чейин РИИБге арыз менен кайрылганын, бирок милиция кызматкерлери тарабынан мыйзамдуу жооп болбогондугун билдирген.

Азыркы учурда УКМК тарабынан кылмыш иши козголуп, Б.Б. жана анын окуучулары Д.Д., К.У., А.Т., С.А., Т.И. кармалып, убактылуу кармоочу жайга киргизилди.

Иликтөө иштери жүрүп жатат.