Венесуэла Колумбия чек арасына 15 миң коопсуздук кызматкерин жайгаштырат

Венесуэланын ички иштер, адилет жана тынчтык министри Диосдадо Кабелло Колумбия менен чек ара өткөрмө пункттарын коопсуз кылуу максатында 15 миң аскер жана полиция кызматкери жайгаштырыла турганын билдирди.

Мамлекеттик телеканалга берген маегинде Кабелло, Колумбия чек арасындагы Зулия жана Тачира штаттарына коопсуздук күчтөрү жайгаштырыларын айтты.

"Аскер жана полициядан турган 15 миң кызматкердин жайгашуусу дароо башталат. Бул жайгашуу Тачира чек арасына чейин жетет. Колумбия өкмөтүнөн да чек аранын бардык тилкесинде тынчтыкты камсыз кылуусун талап кылабыз",- деди ал.

Ал чек арада мыйзамсыз иш-аракеттерге жол берилбей турганын баса белгиледи.

"Биздин бөлүктөр өлкөнүн бардык жеринде жайгашкан жана милдеттерин аткарып жатышат. Максаты – венесуэлалыктардын тынчтыгын жана коопсуздугун камсыз кылуу болот. Бул - ар кандай кырдаалга ыкчам жооп берүүчү натыйжалуу согуштук бөлүк",- деп кошумчалады ал.

Кабелло акыркы операцияларга да токтолду.

"Операциялардын жүрүшүндө 480ден ашуун узун жана кыска ок атуучу куралдар алынган. Биз баңгизатка каршы тамырынан күрөшүп жатабыз, убактылуу эмес. Бул жылы эле 52 тоннадан ашуун баңгизат алынды",- деди ал.