Мексикада бир саатта 13 миң тако даярдалып, Гиннесстин рекорддор китебине киргизилди (видео)

Мексикадагы фестивалда бир сааттын ичинде 13 миңден ашуун тако даярдалып, бул көрсөткүч Гиннесстин рекорддор китебине киргизилди. Бул тууралуу чет элдик басылмалар жазышты.

Маалым болгондой, Гуадалупе шаарында La Discada 2025 аттуу ири гастрономиялык фестиваль өттү.

Фестивалдын алкагында 100дөн ашуун ашпозчу-студенттен турган команда Түндүк Мексиканын ашканасында кеңири таралган эттүү "Дискада" деген тамакты даярдашты. Жасалган азык 7 метрлик чоң табада бышырылды. Анын жалпы салмагы 2509 килограмм болуп, бул дагы өзүнчө рекорд катары катталды.

Иш-чаранын соңунда фестивалдын уюштуруучулары эт аралашмасын мурда даярдалган миңдеген тортильяларга салып, келген конокторго таратышты. Жалпысынан бир саат ичинде 13 215 даана тако даярдалды.

Тако - бул мексикалык улуттук тамак, негизинен жүгөрү же буудай унунан жасалган жука нанга (тортильяга) ар кандай азыктарды салуу менен даярдалат. Тортилья экиге бүктөлүп, анын ичине эт, деңиз азыктары, жашылча, сыр сыяктуу түрдүү азыктар кошулат.