Австралиялык Vogue журналы Кыргызстандагы кол өнөрчүлөр жөнүндө кеңири макала жарыялады

Австралиялык Vogue журналы Кыргызстандагы кол өнөрчүлөр жөнүндө кеңири макала жарыялады. Анда салттуу кийиз өнөрүн сактап, өнүктүрүп жаткан уздар жөнүндө жазылган.

Журналда бул өнөрдү өнүктүргөн, кыргыз маданиятын дүйнөгө таанытып жаткан айымдар тууралуу кеңири жазып, "Тумар" арт-тобунун кол өнөрчүлөрү менен маектешкен. Компаниянын коммерциялык директору Назгүл Эсенбаева акыркы жылдары кыргыз коомунда маданий кайра жаралуу процесси жүрүп жатканын белгилеген.

"Эгемендүүлүктөн кийин биз ким экенибизди түшүнө баштадык. Кыргыз тилибиз, табиятыбыз, музыкабыз, улуттук кийимибиз жана өнөрүбүз – баары биздин өзөгүбүз",- деди ал.

Эсенбаева кийиз өнөрү мурда бааланбай келгенин, бирок аны терең үйрөнгөндө чоң сыймык жана тынчтык тартуулай турганын кошумчалады.

"Мен муундан-муунга өткөрүлүп келе жаткан салттарды улантып жатканыма сыймыктанам жана кыргыз маданиятын өз чыгармам аркылуу өнүктүрүүгө салым кошуп жатканыма кубанычтамын",- деди ал.

Кийизди өндүрүүдө сапаттык көзөмөл катуу жүргүзүлөт. Жумушчулар кийизди салттуу жол менен жасашат: койдун жүнүндөгү чөптөр жана башка табигый аралашмалар кол менен, пинцет жана бычактар менен тазаланып, андан кийин суу жана сүртүү менен тыгыз кийизге айланат. Бул процесс көп убакытты талап кылат, бирок анын натыйжасында продукция узак мөөнөткө чыдамдуу жана эл аралык рынокто атаандаштыкка ээ болот.

"Биз салттуу жол менен жасаганды жакшы көрөбүз. Бул биздин маданиятыбызга урмат көрсөтүүнүн жолу. Табигый жиптерди колдонуу убакытты көп алат, бирок натыйжасы баарына көрүнүп турат",- деп кошумчалады Назгүл айым.