Чек арачылар менен бирге мыйзамсыз иш алып барган адам кармалды

Чет мамлекеттик жарандарга Кыргызстан аймагына кирип-чыгуу жана башпаанек алуу үчүн көмөк көрсөтүп келген деп А.Э. аттуу жаран кармалды. Бул тууралуу Улуттук коопсуздук мамлекеттик комитети билдирди.

Маалыматка ылайык, ал мыйзамсыз иштерди Борбордук Азиядагы кылмыштуу топтордун өкүлдөрү жана УКМК Чек ара кызматынын айрым кызматкерлеринин көмөгү менен ишке ашырып келген. Шектүү кылмыштуу байланыштары аркылуу чет өлкөлүк жарандар үчүн Кыргызстан мамлекеттик чек арасын мыйзамсыз кесип өтүү схемаларын уюштуруп, аларды жер которуу жана туруктуу жашаган жай менен камсыз кылган. Чет өлөлүктөр Чек ара кызматынын өкүлдөрү тарабынан каттоо системасына жалган маалыматтарды киргизүү жолу менен каттоодон өткөрүлгөн.

Атайын кызмат ал буга чейин Ош шаарындагы "Манас" эл аралык аэропортунун директорунун жардамчысы кызматын аркалап келгенин, "Казак" жана "Женго" уюшкан кылмыштуу топторунун өкүлдөрүнүн адвокаты катарында белгилүү экенин кошумчалады.

Учурда козголгон кылмыш ишинин алкагында аталган мыйзамсыз ишке тиешеси бар башка адамдарды аныктоо иштери жүрүүдө.