Орусияда бир эле учурда 25 вирусту аныктаган тест иштелип чыкты

Орусияда биринчи жолу бир эле учурда 25 түрдүү вирусту аныктоого жөндөмдүү тест-систем түзүлдү. Бул тууралуу "Роспотребнадзордун" маалымат кызматы билдирди.

Маалыматка ылайык, окумуштуулар иштеп чыккан реагенттер комплекси ОРВИнин бардык негизги козгогучтарын аныктай алат. Алардын катарына энтеровирус, аденовирус, риновирус, метапневмовирус, респираторно-синцитиалдык вирус, бокавирус, сасык тумоо жана коронавирус кирет.

Бул тест-систем Орусияда расмий катталган алгачкы кеңири спектрдеги диагностика ыкмасы болуп саналат. Ал жогорку тактыкка ээ болуп, дарыгерлерге диагноз коюуну тездетүүгө жана дарылоону убагында баштоого жардам берет.

Мындан тышкары, реагенттердин бардык бөлүктөрү Орусияда өндүрүлүп, чет өлкөдөн жеткирүүгө болгон көз карандылыкты жокко чыгарат. Жаңы технологиялар ОРВИ жана сасык тумоо эпидемиялары күчөй турган мезгилдерде өзгөчө мааниге ээ экени баса белгиленди.