Польшада авиашоуго даярдануу учурунда согуштук учак кулады (видео)

Польшада эл аралык авиашоуго даярдануу учурунда F-16 согуштук учагы кулап кетти. Бул тууралуу аталган өлкөнүн өкмөтүнүн басма сөз катчысы Адам Шлапка билдирди.

"Радом шаарында авиашоуго даярдануу учурунда F-16 учагы кырсыкка учурады. Учкуч каза болду", — деди ал.

Социалдык тармактарда кырсык учурунда тартылган видеолор тарады. Видеодон согуштук учак жогорку ылдамдыкта жерге жакындап, андан соң жерди сүзүп түшүп, катуу жарылуу болгонун көрүүгө болот. Маалым болгондой, учкуч бийиктикти туура эсептей албай калган.

Кырсыктын себептери азырынча белгилүү эмес. Польшадагы 32-Тактикалык авиация базасынын мурдагы командири, Alioth фондунун өкүлү кырсыкка учкучтун катасы себеп болушу ыктымал деп эсептей турганын маалымдады.

"Албетте, авиация кырсыктарын иликтөө комиссиясы техниканын абалын терең изилдейт, бирок биз видеодон көргөн нерселерге караганда, бул көпчүлүк учурда учкучтун катасы катары бааланат", — деп билдирди ал RMF FM радиостанциясында.

Радом шаарында 30-31-август күндөрү пландалган эл аралык авиашоу бул кырсыкка байланыштуу жокко чыгарылды. Бул- Польшадагы эң ири иш-чара, Европадагы эң белгилүү авиашоулордун бири болуп эсептелет. Бул жылы шоуго 20 өлкөдөн 150дөн ашуун учак көрсөтүлмөк.