Мерц: "Путин менен Зеленскийдин жолугушуусу болбойт"

Путин менен Зеленскийдин жолугушуусу болбойт. Бул тууралуу Германиянын канцлери Фридрих Мерц билдирди.

"Президент Дональд Трамп менен президент Путиндин өткөн аптадагы жолугушуусуна карабай, президент Зеленский менен Путиндин жолугушуусу болбойт",- деди Мерц.

Орусиялык тарап бул жолугушууга жогорку деңгээлдеги маселелер жетиштүү түрдө даярдалган шартта гана макул экенин буга чейин билдирген. Бул тууралуу Орусиянын тышкы иштер министри Сергей Лавров да айтып, Путин жолугушууга даяр, бирок ал үчүн бардык маанилүү маселелер алдын ала иштелип чыгышы керек экенин белгилеген.

Буга чейин Трамп 15-августта Аляскада Путин менен өткөн саммиттен кийин, Путин менен Зеленскийдин жолугушуусуна даярдык башталганын жарыялаган. Мындай жолугушууну Киев тарап талап кылып келген, ал эми Зеленский аймактык маселелерди Путин менен гана талкуулай турганын белгилеген болчу.

Мерц бул билдирүүнү 27-августтан 28-августка караган түнү Киевде болгон аба соккуларынан кийин жасаган. Ошол түнү Киевде эки жолу аба коопсуздугу боюнча сигнал берилген. Шаардык администрация билдиргендей, түнкү жарылуулардан улам транспорт кыймылы жарым-жартылай токтотулган жана өрттөн чыккан түтүн шаарды каптаган. Акыркы маалыматтарга караганда, 19 адам каза болгон.

Ошол эле күнү кечинде АКШ да билдирүү жасап, Путин менен Зеленский азырынча жаңжалды өз алдынча токтотууга даяр эмес экенин белгиледи. Ак үйдүн басма сөз катчысы Кэролайн Левитт Трамп Киевге жасалган соккуларга таң калган эмес жана ыраазы да болгон жок деп билдирди. Анын айтымында, АКШ президенти бул боюнча жакын арада кошумча билдирүү жасайт.