Германияда полиция Палестинаны колдогон акцияга катышкандарга катуу чара көрдү

Германиянын борбору Берлин шаарында полиция Израилдин геноцид жүргүзүп жатканын айыптап, Палестинаны колдогон акцияга катышкан адамдарга катуу кийлигишти. Бул тууралуу чет элдик басылмалар жазып чыгышты.

Маалым болгондой, шаарда Газанын аймагындагы Израил кол салууларын, журналисттердин өлтүрүлүшүн жана ачарчылыкты айыптоо максатында болжол менен 200гө жакын Палестина тарапташтары чогулду.

Колдоруна "Газадагы геноцидди токтоткула", "Тамак-аштарды Газадагы элге жеткириңиздер, дароо" жана "Газадагы ачарчылыкты токтоткула, гуманитардык жардамдарды киргизгиле" деген жазуулар жазылган плакаттарды көтөрүшүп, "Террорист Израил", "Бала өлтүргүч Израил", "Газага эркиндик" деген ураандарды чакырышты.

Берлин полициясы акцияга катуу чара көрүп, кээ бир учурда нааразычылыкка чыккандар менен полициянын ортосунда тирешүү болду. Полиция жалпысынан 8 кишини камакка алды.