Jay-Z дүйнөдөгү эң бай музыканттардын сап башына чыкты

Америкалык рэпер жана ишкер Jay-Z Forbes журналынын версиясы боюнча дүйнөдөгү эң бай музыкант деп табылды. Анын байлыгы 2,6 миллиард долларга жетип, эң жакын атаандашынан 1 миллиард долларга көп.

Америкалык рэпердин каржылык ийгилигинин негизги булагы — спирт ичимдиктерин чыгарган бизнеси. 2021-жылы LVMH компаниясы анын Armand de Brignac шампан брендинин 50 пайызын үлүшүн сатып алган. Мындан тышкары, Jay-Z инвестициялык портфелинде Uber жана башка технологиялык компаниялардын акцияларына, сүрөт искусствосунун коллекциясына жана Roc Nation музыкалык лейблине ээ.

Ал эми Тейлор Свифт 1,6 миллиард доллар байлыгы менен эң бай музыкант аял бойдон калууда. Jay-Zден айырмаланып, анын байлыгы негизинен музыкалык ишмердүүлүгү аркылуу топтолгон. 600 миллион доллар гонорарлар жана концерттик турлардан түшсө, дагы 600 миллион анын музыкалык каталогунан түшкөн.

Рианна мурда музыкант аялдардын арасында лидер болсо, азыр үчүнчү орунда турат. Анын байлыгы 1,4 миллиард долларды түзөт, бул мурдагы байлыгынан 300 миллионго аз. Рианнанын негизги кирешеси Fenty Beauty косметикалык бренди аркылуу келет.

Jay-Z хип-хоп тарыхында биринчи миллиардер катары 2019-жылы таанылган, ошол кезде анын байлыгы 1,4 миллиард доллар болгон. Музыка тармагындагы жетишкендиктери да белгилүү. 2021-жылы Рок-н-ролл атак-даңк залына киргизилген, ал эми 2022-жылы Супербоулдагы шоу үчүн "Эмми" сыйлыгына ээ болгон.