Түштүк Кореянын мурдагы премьер-министри аскердик төңкөрүшкө айыпталууда

Кечээ, 29-августта атайын прокурорлор тобу Түштүк Кореянын мурдагы премьер-министри Хан Док Суга экс-президент Юн Сок Ёл тарабынан уюштурулуп ишке ашпай калган мамлекеттик төңкөрүшкө көмөктөшкөнү үчүн айып тагышты. Бул тууралуу Yonhap агенттиги жазды.

Айыптоолордун катарына "төңкөрүш уюштурган адамга жардам берүү", "жалган көрсөтмө берүү", "расмий документтерди жасалмалоо жана жок кылуу" беренелери кирген.

Бирок мурдагы премьер-министрди камакка алуу чарасы колдонулган жок.

Мындан тышкары, айыптоолор экс-президент Юн Сок Ёлдун жубайы Ким Гон Хиге да тагылды. Айыптоо корутундусу аны алдын ала камакта кармоо мөөнөтү аяктаардан эки күн мурун жарыяланган, бул анын камакта кармалуусун дагы 6 айга чейин узартууга мүмкүнчүлүк берет.

Буга чейин, 12-августта Ким Гон Хини камакка алуу ордери берилген. Ал Түштүк Кореядагы BMW автоунаа дилери менен байланышкан акция алдамчылыгына байланыштуу шектелип жатат. Ким Гон Хи 2008–2012-жылдар аралыгында акция баасын жасалма жогорулатып, 800 миллион вон (болжол менен 578 миң доллар) пайда тапкан.

Экс-президент Юн Сок Ёл азыр камакта, ага 2024-жылдын 3-декабрында өлкөдө аскердик абал жарыялап, мамлекеттик төңкөрүш уюштурууга аракет кылган деген айып тагылган. Ал өмүр бою эркинен ажыратылышы мүмкүн.