Токаев: "Ядролук сыноолор кайталанбашы керек"

Казакстан президенти Касым-Жомарт Токаев бүгүн, 29-августта Ядролук сыноолорго каршы эл аралык аракеттер күнүндө казак элинин тарыхый трагедиясын эскерип, келечек муундардын коопсуздугу үчүн тынчтыкты бекемдөөгө чакырды. Бул тууралуу ал социалдык тармактагы баракчасына жазды.

"Бүгүн - Ядролук сыноолорго каршы эл аралык аракеттер күнү. Бул эскерүү датасы БУУнун Башкы ассамблеясы тарабынан Казакстандын демилгеси менен белгиленген. Биздин эл атомдук курал сыноолорунун оор кесепеттерине кабылган. Бул трагедия кайра кайталанбашы керек. Келечек муундар үчүн биз тынчтыкты чыңдап, эл аралык кызматташтыкты өнүктүрүп, ядролук куралдан арылуу жана сыноолордон баш тартуу боюнча чараларды көрүшүбүз зарыл. Тынчтык жана коопсуздук – бул бүт адамзатты бириктирген эң жогорку баалуулуктар",- деди ал.

Маалымат үчүн: 1949-1989-жылдары Казакстандагы Семипалатин полигонунда 450дөн ашуун жер үстүндөгү жана жер алдындагы ядролук жардыруулар болгон. Бул сыноолор аймактагы радиациялык булгануу жаратып, жүз миңдеген адамдардын ден соолугуна терс таасир тийгизген.

1991-жылдын 29-августунда полигон расмий түрдө жабылып, Казакстан өз эрки менен ядролук куралдан баш тарткан алгачкы мамлекеттердин бири болгон.