Индияда төрт кабаттуу үй кулап, 15 адам каза болду

Индияда өз алдынча курулган төрт кабаттуу турак үй урап, кеминде 15 адам каза болду. Бул тууралуу PTI агенттиги билдирди.

Кырсык 27-августта түнкү саат 00:05 чамасында Махараштра штатындагы Палгар округуна караштуу Вирар аймагында болгон. Маалым болгондой, имарат бийликтин уруксаты жок курулган. Болжол менен 50 батирге ылайыкталган бул үй бош турган көп кабаттуу үйдүн үстүнө кулап түшкөн.

Күбөлөрдүн айтымында, каза болгондордун көпчүлүгү имараттын төртүнчү кабатындагы кечеге катышып жатышкан. Дал ошол учурда имараттын бир тарабы урап түшкөн.

Палгар округунун жетекчиси Инду Рани Джахар каза болгондордун саны 15ке жеткенин ырастады. Ал урап калган имараттын астында дагы жабыркагандар болушу мүмкүн экенин айтууда.