Садыр Жапаров "Евразия" паркына 35 миллион доллар инвестиция тартылганын айтты

Президент Садыр Жапаров кечээ, 28-августта "Евразия" аттракциондор паркынын ачылыш аземине катышты. Иш-чаранын алдында мамлекет башчысы парктын аймагын кыдырып, эс алуу шарттары менен таанышты, ошондой эле майрамдын символикалык башталышы болгон балдардын оюн коюусуна барды.

Жаңы парк 10 гектарга жакын аянтты ээлейт. Келгендер үчүн 30га жакын аттракцион, спорттук аянтчалар, фудкорт жана соода түйүндөрү акысыз жеткиликтүү. Кирүү расмий колдонмо аркылуу QR-код менен ишке ашырылат, бул бардык жарандар үчүн бирдей мүмкүнчүлүктү камсыз кылат.

Садыр Жапаров долбоор Евразиялык экономикалык биримдиктин 10 жылдыгына арналган масштабдуу иш-чара болуп саналарын белгилеп, парктын курулушу жана жабдылышы меценаттык каражаттардын эсебинен “Евразия” фонду тарабынан каржыланганын кошумчалады.

"Бул паркка тартылган инвестициянын көлөмү 35 миллион долларды түзөт”,- деди ал.

Бул паркка кирүү акысыз болот. Мамлекет башчысы белгилегендей, бул социалдык жактан бөлүүгө жол бербей, бардык балдарга бирдей шарттарда ойноо жана эс алуу мүмкүнчүлүгүн берүү максатында жасалган.