Иран өзүнүн өзөктүк программасы боюнча жаңы келишимге даяр экенин билдирди

Ирандын тышкы иштер министри Аббас Аракчи БУУнун баш катчысы Антониу Гутерришке жолдогон кайрылуусунда Тегеран өзөктүк программа боюнча жаңы келишим түзүүгө даяр экенин билдирди. Бул тууралуу чет элдик басылмалар жазышты.

Аракчи келечектеги келишим Иран элинин укуктары менен кызыкчылыктарын эске алышы керек экенин белгиледи.

Анын айтымында, Иран конструктивдүү диалог жүргүзүүгө даяр жана өзөктүк программа боюнча жаңы келишимге жетишүүгө аракет кылууда.

"Келишим Тегерандын өзөктүк куралды таратпоо келишимине ылайык болгон укуктарын жана кызыкчылыктарын гана эмес, бардык тараптардын тынчсызданууларын, анын ичинде иран элинин жашоосу менен жыргалчылыгына түздөн-түз таасир эткен санкцияларды да камтуусу керек", — деп жазган дипломат.

28-августта Европа лидерлери Иранга карата санкцияларды кайра киргизүү маселеси боюнча бир пикирге келишкен. Бул чечим «snapback» механизмин иштетүүнү карайт, анын негизинде мурунку санкциялар автоматтык түрдө кайрадан күчүнө кирет.