Бишкектеги "Солист" клубунун күзөтчүсү өз кардарын сабадыбы? Жакындары эмне дейт? (видео)

Бишкектеги караоке клубдардын биринин күзөтчүсү кардарын кабыргасы, буту сынганча сабады. Бул тууралуу бүгүн, 29-августта жабырлануучунун жакындары SUPER.KG порталына кайрылышты.

Алардын айтымында, 24-августта таңкы саат 5:00 чамасында "Солист" караоке-клубунун күзөтчүсү жабырлануучу У.Т.ны ур-токмокко алды. Күзөтчүлөр аны башка адамдын эсебин төлөйсүң деген жүйө менен сабап, натыйжада анын буту жана кабыргасы сынган.

"Жолдошум экөөбүз анын досу менен жолукканы караокеге барганбыз. Бир аз отурган соң кетели деп чечтик. Бирок бизге администратор 2 чек берип, төлөп кетүүбүздү талап кылды. Жолдошумдун досунун досу да бар экен. Ал буйрутмалардын баарын төлөтүп алууну администраторго айтты. Биз өзүбүз буйрутма берген нерселерге гана төлөгөн болчубуз. Эшикке чыгып, кетели деп жатсак 2 күзөтчү менен администратор дагы жаныбызга барды. Биз аларга видеобайкоо менен баарын көрүп, ким, эмне буйрутма бергенин далилдөөнү көздөдүк. Бирок ага карабастан досубуздун шериги жаныбызга келип турганда, жолдошумду күзөтчүлөрдүн бири артынан алып көтөрүп, жерге чапты. Эч ким жардам бербеди, жадакалса клубдун администратору да күлүп, жардам берейин деген ниетте болбоду. Жанында жайгашкан кафенин күзөтчүсү келип, унаага салышып, биз түз эле милицияга бардык. Анан ооруканага жөнөдүк", - деди жабырлануучунун жубайы.

Ошондой эле ал 6 күндөн бери Свердлов райондук милиция бөлүмүнө жазылган арыз боюнча эч ким иш алып барбай жаткандыгын айтып, нааразычылыгын билдирди. Учурда жабырлануучу Бишкек шаарынын №4 шаардык ооруканасына жаткырылып, абалы оор экендиги айтылууда.

Ал эми аталган клуб менен байланышканыбызда, Адилет аттуу башкаруучусу мындай окуя катталбагандыгын айтты.